इयत्ता नववी ते बारावीच्या शाळा 2 डिसेंबरपासून सुरु होणार

 नांदेड  : - जिल्ह्यातील कोविडची स्थिती , त्यादृष्टीने शाळा सुरु करताना करावयाचे नियोजन , शिक्षकांच्या आरटीपीसीआर चाचण्या आणि त्याचे अहवाल येण्यासाठी लागणारा वेळ या बाबींवर आम्ही प्राधान्याने लक्ष केंद्रित केंद्रीत केले . सर्व परिस्थितीचा विचार करून जिल्ह्यातील इयत्ता नववी ते बारावीच्या 23 नोव्हेंबर रोजी सुरु होणाऱ्या शाळा आता स्थगित करण्यात आल्या असून त्या 2 डिसेंबरपासून सुरु करण्यात येतील , असे जिल्हाधिकारी डॉक्टर विपीन इटनकर व जिल्हा परिषदेच्या मुख्य कार्यकारी अधिकारी वर्षा ठाकूर यांनी संयुक्त दिलेल्या प्रसिद्धी पत्राद्वारे स्पष्ट केले . नांदेड जिल्ह्यात इयत्ता नववी ते बारावीच्या 858 शाळा असून त्यात जिल्हा परिषदेच्या 70 शाळा आहेत . इयत्ता नववी ते बारावीला शिकवणारे जिल्हा परिषद व खाजगी शाळांचे असे एकूण 8 हजार 115 शिक्षक आहेत . शाळा सुरु होण्यापूर्वी सर्व शिक्षकांची आरटीपीसीआर चाचणी करून घेण्यासाठी जिल्हा प्रशासनातर्फे नियोजन करण्यात आले . शिक्षकांचे नाव , त्यांची तपासणी तारीख व ठिकाण निश्चित करुन अशा याद्या महानगरपालिका व जिल्हा आरोग्य अधिकारी यांच्याकडे देण्यात आल्या होत्या . जिल्हा परिषदेच्या मुख्य कार्यकारी अधिकारी वर्षा ठाकूर घुगे यांनी शाळारंभाची पूर्वतयारी यासंदर्भाने डायटचे प्राचार्य , शिक्षणाधिकारी प्राथमिक , शिक्षणाधिकारी माध्यमिक आणि शिक्षण विभागातील अधिकाऱ्यांची बैठक घेऊन स्थिती जाणून घेतली . प्राथमिकचे शिक्षणाधिकारी प्रशांत दिग्रसकर माध्यमिकचे शिक्षणाधिकारी बी . आर . कुंडगीर आणि डायटचे प्राचार्य रवींद्र अंबेकर यांनी शाळा सुरु करण्याच्या पूर्वतयारीबाबत माहिती दिली . शिक्षण समितीच्या सभेतही शिक्षण सभापती संजय बेळगे यांनी शाळा सुरु करण्याच्या पूर्वतयारीबाबत सूचना केल्या होत्या . जिल्ह्यातील 2 हजार 282 शिक्षकांची अँटीजन टेस्ट करण्यात आल्या असून 4 हजार 982 शिक्षकांची तपासणी करणे सुरु आहे . यापैकी 927 जणांची आरटीपीसीआर चाचणी केली आहे . तर 2 हजार 702 जणांची चाचणी सुरु आहे . आतापर्यंत 40 टक्के शिक्षकांची तपासणी पूर्ण झाली आहे . उर्वरित तपासणी करुन घेण्यात येत आहे . येत्या 1 डिसेंबरपर्यंत सर्व स्थिती सुरळीत करून 2 डिसेंबरपासून शाळा सुरु करण्यात येईल , असे जिल्हा परिषदेच्या अध्यक्षा मंगाराणी अंबुलगेकर , सभापती संजय बेळगे जिल्हाधिकारी डॉ . विपीन इटनकर व जिल्हा परिषदेच्या मुख्य कार्यकारी अधिकारी वर्षा ठाकूर - घुगे यांनी सांगितले आहे .

Read More

शासनाने निश्चित केलेल्या दराने एन -95 मास्कची खरेदी व विक्री करण्याचे आवाहन

नांदेड दि . 3 : - शासनाने ठरवून दिलेल्या किंमतीत जनतेने मास्कची खरेदी करावी . ऑक्टोंबर 2020 रोजीच्या शासन निर्णयानुसार ठरवून दिलेल्या विक्री किंमतीत एन -95,3 व 2 प्लाय मास्कची विक्री औषध विक्रेत्यांनी करावी . कोणता औषध विक्रेता जास्त किंमतीत मास्कची विक्री करत असल्यास त्याची तक्रार अन्न व औषध प्रशासन कार्यालयास करावी , असे आवाहन अन्न व औषध प्रशासन विभागाचे सहाय्यक आयुक्त ( औषधे ) मा . ज , निमसे यांनी केले आहे . सध्या देशात व राज्यात कोविड -19 चा संसर्ग सुरु असून त्यावर नियंत्रण मिळविण्यासाठी शासनामार्फत विविध उपाययोजना करण्यात येत आहेत . सध्या अनलॉकडाऊन प्रक्रीया सुरु असून शासनाने टप्प्या - टप्याने दैनंदिन व्यवहार , दळणवळण वाहतूक यांना परवानगी दिली आहे . परंतु खबरदारी म्हणून शासनाने सामाजिक अंतर राखणे , हात वारंवार स्वच्छ धुणे , गर्दी टाळणे , गर्दीच्या ठिकाणी मास्क वापरणे इत्यादी बाबी बंधनकारक केल्या आहेत . त्यामुळे सामान्यांना मास्क वापरणे व त्याची खरेदी करणे शक्य व्हावे याकरीता शासनाच्या 20 ऑक्टोंबर 2020 रोजीच्या निर्णयानुसार एन -95 , 3 व 2 प्लाय मास्क यांच्या किंमती निश्चित केल्या आहेत . त्यामुळे सर्व घाउक , किरकोळ उत्पादकांना शासन निर्णयानुसार मास्कची विक्री निश्चित केलेल्या विक्री किंमतीस विक्री करणे बंधनकारक केले आहे . मास्कचे दरपत्रक दुकानाच्या दर्शनी भागावर प्रदर्शित करावे शासन निर्णयाच्या अंमलबजावनीसाठी प्रशासनाच्यावतीने औषध विक्रेत्यांच्या तपासण्या करण्याची मोहिम हाती घेण्यात आली आहे . त्यानुसार औषध निरीक्षक औषध विक्रेत्यांच्या तपासण्या करत आहेत . तपासणीत महाराष्ट्र शासनाच्या शासन निर्णयाचे उल्लंघन होत असल्याचे आढळून आल्यास अशा व्यक्ती विरुध्द प्रशासनाच्यावतीने कायदेशिर कार्यवाही करण्यात येईल , असेही आवाहन अन्न व औषध प्रशासन विभागाचे सहाय्यक आयुक्त ( औषधे ) मा.ज निमसे यांनी केले आहे .

Read More