शेतकरी स्तरावरील ई-पीक पाहणीसाठी 22 ऑक्टोंबर पर्यंत मुदतवाढ

नांदेड  :- राज्याच्या काही भागात उशिराच्या मान्सूनमुळे काही शेतकऱ्यांना अद्यापही आपली - पीक पाहणी पूर्ण करता आलेली नाही. याचा विचार करुन जमाबंदी आयुक्त पुणे यांच्या मान्यतेने मोबाईल ॲपद्वारे शेतकरी स्तरावरील ई-पीक पाहणीची कालमर्यादा वाढविण्याचा निर्णय घेण्यात आला आहे. त्याचप्रमाणे खरीप हंगाम 2022 च्या शेतकरी स्तरावरील ई-पीक पाहणीची कालमर्यादा 22 ऑक्टोंबर 2022 पर्यंत वाढचिण्याचा निर्णय घेण्यात आला आहे. तसेच तलाठी स्तरावरील ई-पीक पाहणीचा कालावधी 23 ऑक्टोंबर ते 15 नोव्हेंबर 2022 असा करण्यात येत आहे. खरीप हंगाम 2022 ची ई-पीक पाहणी करण्यासाठी ही अंतिम मुदतवाढ आहे.

जिल्ह्यातील सर्व तलाठी, मंडळ अधिकारी, कृषि सहाय्यक तसेच मंडळ कृषि अधिकारी आणि सर्व शेतकरी बांधवांनी याची नोंद घ्यावी असे आवाहन राज्य समन्वय, ई-पीक पाहणी प्रकल्प जमाबंदी आयुक्त कार्यालय तथा उपजिल्हाधिकारी श्रीरंग तांबे यांनी केले आहे.

राज्यव्यापी केलेल्या ई-पीक पाहणी प्रकल्पाची अंमलबजावणी जमाबंदी आयुक्त कार्यालय पुणे या कार्यालयामार्फत करण्यात येत आहे. सध्या खरीप 2022 हंगामाची पीक पाहणीची कार्यवाही सुरू आहे. खरीप हंगाम 2022 च्या ई-पीक पाहणीच्या नोंदणीसाठी ई - पीक पाहणीचे 2.0.4 हे अपडेटेड व्हर्जन गुगल प्लेस्टोअरवर उपलब्ध करून दिले आहे. खरीप हंगाम 2022 ची ई-पीक पाहणी प्रत्यक्ष मोबाईल अॅपद्वारे करण्यासाठी 15 ऑक्टोंबर 2022 पर्यंत मुदत देण्यात आली होती.

Read More

हरभरा बियाणेसाठी महाडीबीटी पोर्टलवर अर्ज करावेत

नांदेड  :- राष्ट्रीय अन्न सुरक्षा अभियान कडधान्य सन 2022-23 अंतर्गत रब्बी हंगामामध्ये हरभरा या पिकांचे अनुदानित दराने बियाणे वितरण (दहा वर्षा आतील वाण) या घटकाअंतर्गत नांदेड जिल्ह्यात महाराष्ट्र राज्य बियाणे महामंडळ, राष्ट्रीय बीज निगम लि. कृषक भारती को ऑप या बियाणे वितरण संस्थेमार्फत राबविण्यात येत आहे. या अनुदानावरील बियाण्याचा लाभ घेण्यासाठी 21 ऑक्टोबर 2022 महाडिबीटी पोर्टलवर अर्ज करावेत, असे आवाहन कृषी विभागाच्यावतीने करण्यात आले आहे.

अर्ज केलेल्या लाभार्थ्यांनी तालुका कृषी अधिकारी कार्यालयाकडून कृषी सहाय्यक मार्फत परमिट देण्यात येत आहे. प्रमाणित बियाणे वितरण अंतर्गत शेतकऱ्यांनी महाराष्ट्र राज्य बियाणे, महामंडळ राष्ट्रीय बीज निगम व कृषक भारती को. ऑप यांच्या वितरकांकडे परमिट देऊन अनुदान वगळता उर्वरित रक्कम देऊन हरभरा बियाणे खरेदी करावे.

या बियाणास 25 रूपये प्रती किलो अनुदान देण्यात येते. तसेच हरभरा ग्रामबीजोत्पादन कार्यक्रमाअंतर्गत प्रती शेतकरी एक एकर मर्यादेत अनुदानावर बियाणे पुरवठा करण्यात येणार आहे. यामध्ये 10 वर्षाआतील वाणास (राज विजय -202.फुले विक्रम. फुले विक्रांत, एकेजी - 1109 - पिडीकेव्ही कांचन बीजी - 3062 पुसा पार्वती, बीजीएम 10216 पुसा ) रुपये 25 प्रती किलो व 10 वर्षावरील वाणास (जॉफी -9218 विशाल, दिग्विजय विजय, विराट) रूपये 20 प्रती किलो अनुदान वगळता उर्वरित रक्कम महाबीज वितरकाकडे देऊन खरेदी करावे. जिल्ह्यात कृषी विभागामार्फत हरभरा प्रमाणित बियाणे अंतर्गत 3202 क्विंटल बियाणे व हरभरा ग्रामबीजोत्पादन कार्यक्रम अंतर्गत 11919 क्विंटल बियाणे वाटप करण्यात येणार आहेत. अधिक माहितीसाठी आपल्या गावातील कृषी सहाय्यक यांच्याशी संपर्क साधावा असे आवाहन जिल्हा अधिक्षक कृषी अधिकारी नांदेड यांनी केले आहे.

Read More

जिल्ह्यातील नदीपात्रातून अवैधरित्या रेती उत्खनन करण्यास प्रतिबंध

नांदेड  :- जिल्ह्यातील गोदावरी, पैनगंगा, मांजरा, लेंडी या नदी पात्राच्या दोन्ही बाजुस मोठ्या प्रमाणात परप्रांतीयांमार्फत नदीपात्रातून अवैधरित्या रेती उत्खनन व तीच रेती अवैध वाहतुकीद्वारे उपलब्ध होत असल्याचे आढळून येत आहे. परप्रांतीयांच्या माध्यमातून नदी पात्रातून तराफे, बोट इत्यांदीच्या सहाय्याने अवैध रेती उत्खनन, साठवणूक व वाहतूक करू नये. यासाठी सदर ठिकाणी 15 ऑक्टोंबर ते 14 डिसेंबर 2022 पर्यंत ट्रॅक्टर मालक, त्यांचे नोकर, ट्रक्टर चालकांना याठिकाणी रेती उत्खनन करण्यास फौजदारी प्रक्रिया संहिता 1973 चे कलम 144 अन्वये जिल्हादंडाधिकारी अभिजीत राऊत यांनी प्रतिबंध केले आहे.

रेतीची वाहतूक, उपसा करण्यास प्रतिबंध करण्यास तसेच नांदेड जिल्ह्यातील गोदावरी, पैनगंगा, मांजरा, लेंडी या नदी पात्राच्या दोन्ही बाजुस मोठ्या प्रमाणात रेतीचा अवैध उपसा करून ट्रक, टिपर, हायवा ट्रॅक्टर मालक व त्यांचे नोकर, चालकांनी रेती उत्खनन करू नये. त्याचप्रमाणे नदी लगत शेती असणाऱ्या शेतकऱ्यांनी इतरांनी अवैधरित्या रेतीचा साठा करू नये अथवा करू देऊ नये, असेही आदेशात स्पष्ट केले आहे.

Read More

धर्माबाद, बिलोली, माहूर, लोहा, भोकर, हिमायतनगर तालुक्यातील गावे बाधीत क्षेत्र म्हणून घोषित

लम्पी आजाराबाबत जिल्हा प्रशासन दक्ष

नांदेड :- जिल्ह्यात उद्भवलेल्या लम्पी आजारावर नियंत्रण आणण्यासाठी जिल्हा प्रशासन दक्ष आहे. धर्माबाद तालुक्यातील करखेली, चिंचोली बिलोली तालुक्यातील आरळी, बावलगाव तसेच माहूर तालुक्यातील पापलवाडी लोहा तालुक्यातील कलंबर भोकर तालुक्यातील नांदा, पाळज, रायखोड हिमायतनगर तालुक्यातील करंजी या गावात लम्पी आजाराचा प्रादुर्भाव दिसून आल्याने ही वे बाधीत क्षेत्र म्हणून घोषित करण्यात आली आहेत.

प्राण्यामधील संक्रामक व सांसर्गिक रोगास प्रतिबंध व नियंत्रण अधिनियम 2009 अन्वये जिल्हाधिकारी अभिजीत राऊत यांनी जिल्ह्यातील धर्माबाद तालुक्यातील चोंडी, कारेगाव बिलोली तालुक्यातील हुनगुंदा, कांगठी, भोसी तसेच लोहा तालुक्यातील पिंपळदरी येथील पशुधनामध्ये लम्पी स्किन डिसीजची लागण झाल्याचा रोग निदान अहवाल सहआयुक्त पशुसंवर्धन, रोग अन्वेषण विभाग, औंध पुणे यांच्याकडून प्राप्त झाला आहे. धर्माबाद तालुक्यातील करखेली, चिंचोली व बिलोली तालुक्यातील आरळी व बावलगाव व माहुर तालुक्यातील पापलवाडी लोहा तालुक्यातील कलंबर, भोकर तालुक्यातील नांदा, पाळज, रायखोड हिमायतनगर तालुक्यातील करंजी येथील पशुधनामध्ये लम्पी स्किन डीसीजची लक्षणे आढळून आली आहेत.

भारत सरकारचा पशुसंवर्धन व दुग्ध व्यवसाय विभाग तसेच पशुसंवर्धन आयुक्त पुणे यांनी रोग प्रतिबंध व नियंत्रणासाठी मार्गदर्शक सूचना निर्गमित केल्या आहेत. याअनुषंगाने जिल्हाधिकारी तथा आपत्ती व्यवस्थापन प्राधिकरणाचे अध्यक्ष अभिजीत राऊत यांनी पुढीलप्रमाणे आदेश निर्गमित केले आहेत. लम्पी स्किन रोग प्रादुर्भावग्रस्त व बाधीत झालेली धर्माबाद तालुक्यातील करखेली, चिंचोली व बिलोली तालुक्यातील आरळी व बावलगाव व माहुर तालुक्यातील पापलवाडी लोहा तालुक्यातील कलंबर, भोकर तालुक्यातीलनांदा, पाळज, रायखोड हिमायतनगर तालुक्यातील करंजी ही गावे बाधीत क्षेत्र म्हणून घोषित केली आहेत. रोग प्रादुर्भावाच्या ठिकाणापासून 5 कि.मी. त्रिज्येचा परिसर सतर्कता क्षेत्र म्हणून घोषित केले आहे. या परिसरातील गावांमध्ये बाधीत जनावरे वगळता इतर जनावरांचे प्रतिबंधात्मक लसीकरण करावे. साथीच्या काळात बाधीत भागातील जनावरे व मानवाचा निरोगी भागात प्रवेश प्रतिबंधित करण्यात येत आहे. बाधीत गावामध्ये जनावरांच्या पिण्याच्या पाण्यासाठी व चराई करिता पशुपालकांनी स्वतंत्र व्यवस्था करावी. रोग प्रादुर्भावग्रस्त क्षेत्रामध्ये गाई व म्हशींना स्वतंत्र ठेवणे, बाधीत व अबाधीत जनावरे वेगळी बांधणे तसेच या रोगाने ग्रस्त पशुधनाचा मृत्यु झाल्यास मृतदेहाची शास्त्रीय पद्धतीने पशुपालकांनी विल्हेवाट लावावी, असे आदेशात स्पष्ट करण्यात आले आहे.

बाधीत परिसरामध्ये स्वच्छता व निर्जंतुक द्रावणाची फवारणी, रोग प्रसारास कारणीभूत असलेल्या डास, माश्या, गोचीड इत्यादीच्या नियंत्रणासाठी औषधांची फवारणी, लम्पी स्किन रोगांचा प्रादुर्भाव व प्रसार थांबविण्यासाठी नांदेड जिल्ह्यातील सर्व ग्रामपंचायती, नगरपरिषद, नगरपंचायत व महानगरपालिका यांचेमार्फत त्यांचे कार्यक्षेत्रातील भटक्या पशुधनाचे नियमित निरीक्षण करण्यात यावे. तसेच बाधीत पशुधनाची काळजी घ्यावी असे सांगितले आहे. कायद्याशी सुसंगत कृती न करणाऱ्या आणि कायद्याच्या अंमलबजावणीमध्ये अडथळा निर्माण करणाऱ्या पशुपालक, व्यक्ती, संस्था प्रतिनिधी यांचेविरुध्द नियमानुसार गुन्हा दाखल करणे. तसेच कार्यवाही प्रस्तावित करण्यासाठी त्या-त्या क्षेत्रातील पशुधन विकास अधिकारी यांना प्राधिकृत करण्यात आले आहे. सर्व खाजगी पदविकाधारकांनी / पशुपालकांनी लम्पी स्किन रोगांची माहिती शासकीय पशुवैद्यकीय संस्थेस देणे बंधनकारक आहे. लम्पी स्किन रोगाचा उपचार पशुधन विकास अधिकारी किंवा त्यांचे मार्गदर्शनानुसार करण्यात यावा. खाजगी पदविकाधारकांनी लम्पी स्किन रोगांचा परस्पर उपचार केल्यास कायदेशीर कारवाई करण्यात येईल. नांदेड जिल्ह्यातील सर्व पशुवैद्यकीय संस्थांनी लम्पी स्किन रोगांच्या उपचारासाठी आवश्यक सर्व औषधी वरिष्ठांशी चर्चा करुन उपलब्ध करुन घ्याव्यात, असेही आदेशात जिल्हाधिकारी अभिजीत राऊत यांनी स्पष्ट केले आहे

Read More

उपकर योजनेत कृषी साहित्याचा लाभ घेण्याचे आवाहन

नांदेड  :- जिल्हा परिषद उपकर योजना 2022-23 अंतर्गत शेतकऱ्यांना अनुदानावर डीबीटी व कॅशलेस पध्दतीचा अवलंब करुन बॅटरी कम हॅन्ड ऑपरेटेड नॅपसॅक स्प्रेअर, ताडपत्री, 3 एच. पी / 5 एच. पी. ओपनवेल सबमर्शिबल पंप संच, पॉवर ऑपरेटेड चाफ कटर (कडबा कटर), ट्रॅक्टर चलित रोटाव्हेटर, धान्य प्रतवारी करण्यासाठी स्पायरल सेपरेटर, सोयाबीन प्लँटर, फुलशेती लागवडीसाठी प्रोत्साहनपर अनुदानाचा लाभ देणे आहे. जिल्ह्यातील गरजू शेतकऱ्यांनी या औजाराचा/कृषी साहित्यांचा लाभ घेण्यासाठी पंचायत समितीकडे प्रस्ताव सादर करावेत, असे आवाहन जिल्हा परिषदेचे कृषि विकास अधिकारी नांदेड यांनी कळविले आहे.

Read More

व्यावसायिक संजय बियाणी हत्याकांडातील प्रमुख आरोपी ताब्यात, अल्पवयीन आरोपीला दिल्ली पोलिसांनी गुजरातमध्ये पकडलं

नांदेड: येथील प्रसिद्ध बांधकाम व्यावसायिक संजय बियाणी (Sanjay Biyani) यांची 5 एप्रिल 2022 रोजी निर्घृणपणे हत्या करण्यात आली होती. उद्योजक संजय बियाणी हत्याकांडातील मुख्य आरोपीला दिल्ली पोलिसांनी ताब्यात घेतलं आहे. नांदेड शहरातील शारदानगर स्थित संजय बियाणी यांच्या घरासमोरच भरदिवसा गोळ्या झाडून त्यांची हत्या करण्यात आली होती. ज्यामुळे संपूर्ण नांदेड जिल्ह्यातील नागरिकांत व व्यावसायिकांमध्ये दहशतीचे आणि भीतीचे वातावरण निर्माण झाले होते.

शारदा नगर परिसरात सकाळी 12 वाजण्याच्या सुमारास उद्योजक संजय बियाणी हे त्यांच्या गाडीने घरासमोर दाखल झाले. दरम्यान पाठीमागून मोटारसायकलवर आलेल्या दोन मारेकऱ्यांनी अंदाधुंद गोळीबार करत त्यांची हत्या केली. ज्यात त्यांचा जाग्यावरच मृत्यू झाला. यातील दोन प्रमुख आरोपींपैकी गोळीबार करणारा आणि मोटारसायकल चालवत येऊन अंधाधुंद गोळीबार करणारा आरोपी दिल्ली पोलिसांनी जेरबंद केला आहे.

नांदेड पोलिसांनी या प्रकरणाच्या चौकशीसाठी SIT गठित केली होती. हे पथक देशाच्या सहा राज्यात आणि बाहेर देशाची वारीही करून आले. हे मुख्य आरोपी अटकेत आणण्यासाठी नांदेड पोलिसांनी जंग जंग पछाडले आणि आज दिल्ली पोलिसांनी गुजरातमधून सदर अल्पवयीन मुख्य आरोपीस ताब्यात घेतलं आहे. तब्बल सहा महिन्याच्या अथक प्रयत्नांनंतर पोलिसांना यातील मुख्य आरोपी पकडण्यात यश आले आहे.

काही दिवसांपूर्वी दिल्ली येथील मोहाली येथे गुप्तचर यंत्रणेच्या कार्यलयावर बॉम्ब हल्ला करण्यात आला होता. ज्यात सदर आरोपी हा सह आरोपी आहे. नांदेड येथील संजय बियाणी यांच्या हत्येनंतर सदर आरोपीने दिल्ली आणि इतर ठिकाणी असे अनेक गंभीर गुन्हे केल्याची सूत्रांची माहिती आहे. दरम्यान सदर आरोपी हा 18 वर्षे वयोगटाच्या आतील अल्पवयीन आरोपी आहे. सदर अल्पवयीन आरोपी हा उत्तरप्रदेश येथील फैजाबाद येथील रहिवासी आहे. ज्यास दिल्ली स्पेशल सेलने गुजरात मधून ताब्यात घेतले आहे.

Read More