बिलोली तालुक्यातील 17 पॉझिटिव्ह

बिलोली : शहरापाठोपाठ कोरोनाने ग्रामीण भागातही शिरकाव केला असून गत आठवड्यापासून रुग्ण संख्येत झपाट्याने वाढ झाली आहे . २ ऑगस्ट रोजी बिलोली शहरात ७ , येसगीत ८ तर कार्ला फाटा येथे १ असे तब्बल १६ कोरोनाबाधित रुग्ण आढळून आले . कासराळी , मिनकीनंतर येसगी , कार्ला गाव कंटेन्मेंट झोन करण्यात आले आहे . त्यामुळे सर्वत्र एकच खळबळ उडाली आहे . आता तालुक्याची संख्या ६० वर केली आहे . बिलोली तालुक्यातील येसगी व बिलोली येथील त्या कोरोना बाधितांच्या संपर्कातील नागरिकांची रॅपिड किटद्वारे चाचणी केली असता तब्बल १६ जण बाधित आढळून आले . त्यांना कोविड सेंटर येथे दाखल करुन त्यांच्यावर उपचार करण्यात आले असून प्रतिबंधित क्षेत्रामधील सर्वांचे कोरोना स्वब तपासले जाणार असल्याची माहिती वैद्यकीय अधीक्षक डॉ.नागेश लखमावार यांनी दिली . गत २ महिन्यांत केरुर , चिंचाळा , आरळी , नागणी , कुंडलवाडी , सगरोळी व मिनकी पाठोपाठ येसगी व कार्ला येथेही कोरोनाबाधित रुग्ण आढळून आल्याने नागरिकांत चांगलेच भीतीचे वातावरण पसरले आहे .उपविभागीय अधिकारी शरद झाडके यांच्या मार्गदर्शनाखाली सार्वजनिक आरोग्याच्या दृष्टीने तसेच नागरिकांचे हित व सुरक्षिततेच्या दृष्टिकोनातून आरोग्य चमूद्वारे दारोदारी जाऊन नागरिकांची तपासणी केली जात आहे . आजारी व्यक्तींना वेळीच औषधोपचार व सल्ला दिला जात आहे . सदर बाधित रुग्ण आढळून आलेली गावे कंटेन्मेंट झोन करुन कोरोनाला गाव , शहराबाहेर करण्यासाठी तहसीलदार , विक्रम राजपूत , तालुका आरोग्य अधिकारी गणपत वाडेकर , मुख्याधिकारी डॉ.ओमप्रकाश गोंड , तलाठी , ग्रामसेवक , पोलीस पाटील , गावसमिती आदी सहकार्य करीत आहेत .