आज पासून दुकाने उघडी ठेवण्याच्या वेळेत बदल ; जिल्हाधिकारी डॉ . विपीन यांचे आदेश

नांदेड: जिल्ह्यातील दुकानांना सकाळी 7 ते सायंकाळी 5 अशी वेळ दुकाने उघडी ठेवण्यासाठी होती . त्यात आज जिल्हाधिकारी डॉ.विपीन यांनी थोडासा बदल करुन सकाळी 9 ते सायंकाळी 7 दुकाने उघडी ठेवता येतील , असे आदेश जारी केले आहेत . नांदेड जिल्ह्यात कोरोना विषाणूच्या प्रादुर्भावानंतर वेगवेगळे अनेक आदेश लागू झाले . त्यानुसार सुरुवात 14 मार्च 2020 पासून झाली . त्यासाठी साथरोग प्रतिबंधक कायदा 1897 च्या तरतुदीचा आधार घेण्यात आला . पुढे हळूहळू लॉकडाऊनमध्ये बदल झाला त्यात आज दि .11 ऑगस्ट रोजी जिल्हाधिकारी डॉ.विपीन यांनी 19 जुलै 2020 रोजी दिलेल्या आदेशात थोडासा बदल केला आहे .आजपर्यंत शनिवार , रविवार वगळता आठवड्याच्या पाच दिवस दुकाने , आस्थापना सुरु ठेवण्यासाठी सकाळी 7 ते सायंकाळी 5 वाजेपर्यंतचा वेळ देण्यात आला होता . आज त्यात थोडासा बदल करुन सकाळी 9 ते सायंकाळी 7 अशा वेळेत दुकाने आणि आस्थापना सुरु राहतील . शनिवार आणि रविवार पूर्ण बंद राहील . साथरोग नियंत्रणासाठी देण्यात आलेल्या सूचना पाळत आपली दुकाने सुरु ठेवायची आहेत , असे डॉ . विपीन यांनी आपल्या आदेशात म्हंटले आहे . साथरोग प्रतिबंधक नियमानुसार कोणताही गैरप्रकार झाला तर त्याविरुध्द कायदेशीर कारवाई होईल , असेही या आदेशात नमुद आहे .