भोकर जवळील सुधा तलावात अनोळखी इसमाचा मृतदेह आढळल्याने सर्वत्र खळबळ उडाली..

भोकर प्रतिनिधी :- भोकर शहरापासून जवळच असलेल्या सुधा तलावात दि.११ डिसेंबर च्या दुपारी अडीच वाजता एका अनोळखी इसमाचा मृतदेह आढळल्याने सर्वत्र खळबळ उडाली आहे.

घटनेचे वृत असे की दि.११ डिसेंबर सोमवार रोजी दुपारी सुमारे अडीच वाजताच्या दरम्यान सुधा तलावालगत गुरे चारण्यासाठी नेलेल्या गुरख्यांना मृतदेह तरंगत असल्याचे दिसल्याने गुराखी लोकांनी याची पोलिसांना माहिती कळवली. यावरून पोलीस निरीक्षक नानासाहेब उबाळे, फौजदार विकास आडे, पोलीस अंमलदार भीमराव जाधव, गुरुदास अरेवार, मंगेश क्षीरसागर आदी पोलिस आधिकारी व कर्मचारी यांनी लगेच घटनास्थळी धाव घेऊन स्थानीक मच्छीमारांच्या मदतीने तलावातून मृतदेह बाहेर काढण्यात आला त्यावेळी मृतदेहाचे दोन्ही हात हे पाठीमागे बांधण्यात आलेले होते. त्यामूळे ही आत्महत्या केलेली नसून तो घातपात असल्याचा पोलिसाकडून संशय व्यक्त केल्या जात आहे. सदरील मृतदेह हा ग्रामीण रुग्णालय भोकर येथे आणण्यात आले असून पोलीसांकडून ओळख पटवण्याचे काम सुरू आहे. मयताच्या हातावर तेलगु भाषेत आई तर इंग्रजी भाषेत सनी, सिंधू नरेश, प्रिया अश्या नावाचे ट्याटू ने गोंदलेली नावे आहेत.

पोलिसांनी दिलेल्या माहितीनुसार, मृत व्यक्तीचे वय अंदाजे ३५ वर्षे असावे असे सांगण्यात आले आहे. पोलिसांकडून मृतदेहाची ओळख पटविण्यासाठी प्रयत्न चालू आहेत. सदरील इसमाची ओळख पटविण्यासाठी मृतदेह हा डॉ. शंकररावजी चव्हाण शासकीय वैद्यकीय रुग्णालय विष्णुपुरी नांदेड येथील शवगृहात ठेवले जाणार असल्याचे कळते.