बिलोली आगारातील बसचालकाचा प्रामाणिकपणा

(बिलोली)नांदेड ते सगरोळी प्रवासादरम्यान एका प्रवाशाची दागिन्यांची बॅग बसमध्येच विसरुन राहिली . आगारात बस जमा करताना वाहकाला या बसमध्ये १ . २० लाखांच्या दागिन्यांची बॅग सापडली व त्याने ही बॅग संबंधीत प्रवाशाला देत प्रामाणिकपणाचा प्रत्यय आणून दिला . २७ ऑक्टोबर रोजी रोजी नांदेड ते सगरोळी बस क्र . एम एच २० बीएल २३० या बसवर चालक आर . एन . भालेराव व वाहक एस . एम . याबनोड हे कर्तव्यावर होते . नांदेडहून सकाळी ९ . ३० वाजता निघालेल्या बसमध्ये सगरोळी येथील रहिवासी व पुणे येथे अभियंता महेश पायरे व त्यांच्या पत्नी रूक्मीनी पायरे हे सगरोळीला जाण्यासाठी निघाले होते . सगरोळी गाव आल्यानंतर पायरे दाम्पत्य आपली बॅग सोबत घेऊन जाण्याऐवजी बसमध्येच विसरले . नंतर बसच्या फेऱ्या संपल्याने बस आगारात जमा करण्यासाठी नेत असताना दुपारी १२ . ३० वाजता वाहक याबनोड यांना कोणी तरी प्रवासी बसमध्येच बॅग विसरल्याचे लक्षात आले . त्यानंतर याबनोड यांनी वाहतुक निरीक्षक ओमप्रकाश इंगोले व वाहतूक निरीक्षक खुशाल ओलापाडे यांना याबाबत माहिती दिली . अधिकाऱ्यांनीही लगेचच बॅग ताब्यात घेत बॅगचा पंचासमक्ष पंचनामा केला . बॅगेत आढळून आलेल्या भ्रमणध्वनीवर फोन करून चौकशी केली असता सगरोळीत उतरलेल्या पायरे दाम्पत्याची ही बॅग असल्याची खात्री पटल्यानंतर त्यांना १ . २० लाखांचे दागिने या बॅगमध्ये आढळून आले . दागिन्यांची ही बॅग अधिकाऱ्यांसमक्ष पायरे दाम्पत्यांना परत करुन प्रामाणिकपणाचा प्रत्यय वाहक एस . एम . याबनोड यांनी आणून दिला . प्रवाशाची विसरलेली दागिने असलेली बॅग चालक व वाहकाने प्रामाणिकपणा दाखवून एसटी महामंडळाचा अभिमान वाढविला . त्याबद्दल त्यांचे बिलोली आगारप्रमुख संजय वाळवे यांनी कौतुक केले आहे . तसेच पायरे दाम्पत्यानेही चालक - वाहकांचे आभार मानले आहेत . २१ व्या शतकातही चालक व वाहकाने प्रामाणिकपणा दाखवून दिला आहे .