बिलोली तालुक्यात सहा महिन्यांच्या चिमुकल्यासह तब्बल ११ जण कोरोनाबाधित

बिलोली : तालुक्यातील सगरोळी या गावात गत तीन दिवसांपूर्वी कोरोनाने शिरकाव केला . ' त्या ' बाधित रुग्णांच्या संपर्कातील ६ महिन्यांच्या चिमुकल्यासह तब्बल ११ जण कोरोनाबाधित झाल्याचे तपासणीत निष्पन्न झाले . सगरोळी येथील त्या बाधिताला हृदयविकाराचा झटका आल्याने त्यास नांदेड येथील खाजगी रुग्णालयात उपचार करुन हैद्राबाद येथे पाठविले असता त्यांचा स्वब अहवाल पॉझिटिव्ह आल्याने त्यांच्या संपर्कातील १४ जणांचे स्वब अहवाल तपासणीसाठी पाठविले होते . 

त्यातील ११ व्यक्ती हे कोरोनाबाधित आढळून आले तर अन्य निगेटिव्ह आल्याची माहिती वैद्यकीय अधीक्षक डॉ.नागेश लखमावार यांनी दिली . बिलोली शहरापाठोपाठ कोरोनाने ग्रामीण भागातही पाय पसरल्याने तालुका आरोग्य प्रशासनासह गावकऱ्यामध्ये चिंता वाढली असून यावर तातडीने उपाय योजना करून गाव सुरक्षित ठेवण्यासाठी म्हणून तालुका आरोग्य अधिकारी गणपत वाडेकर हे आरोग्य कर्मचाऱ्यासह सगरोळीत दाखल झाले . बाधित क्षेत्रातील सर्व क्षेत्र कंटेनमेंट झोन घोषित करुन ग्रामपंचायत , शिक्षण संस्था , सामाजिक कार्यकर्ते , पदाधिकारी यांच्या मदतीने उपाययोजनेचे काम युद्धपातळीवर सुरु करण्यात आले आहे . ग्रामीण भागातील सर्वात मोठी सगरोळी ग्रामपंचायत असून मोठी बाजारपेठ आहे . या गावाशी परिसरातील दहा ते पंधरा गावांचा संबंध नेहमीच येत असतो . तालुक्यात कोरोनाबाधितांची संख्या कमी होत असताना अगदी निवांत असलेल्या गावात आता कोरोनाचा शिरकाव झाला असल्याकारणाने सदर गावासह परिसरात चिंता वाढली आहे . बिलोली तालुक्यात आतापर्यंत तब्बल ४५ जणांना कोरोनाची लागण झाली होती . त्यापैकी ३१ जणांनी कोरोनावर मात केलीतर ६ महिन्यांच्या चिमुकल्यासह ११ बाधित रुग्ण कोविड सेंटर येथे उपचार घेत आहेत .