नांदेड शंभरीच्या दोन पाऊल_दूर । करबला भागात आढळला आणखी एक कोरोना पॉसिटीव्ह , नांदेडचा आकडा 98 वर .

  नांदेड दि . 19 | शहरातील करबला भागात एक नवीन पॉझिटिव्ह रुग्ण पुरुष ( वय 60 वर्षे ) आढळला असून या रुग्णावर यात्री निवास एनआरआय भवन येथे औषधोपचार सुरु आहेत . सद्य : स्थितीत त्यांची प्रकृती स्थिर आहे . त्यांच्या संपर्कातील व्यक्तींचा शोध घेणे चालू आहे . कोरोना विषाणु संदर्भात मंगळवार 19 मे 2020 रोजी सकाळी 11 वा . नांदेड जिल्हा शल्यचिकित्सक डॉ . निळकंठ भोसीकर यांनी प्रसिद्धी पत्रकात दिलेल्या माहितीनुसार 17 व 18 मे रोजी पाठविण्यात आलेल्या 182 स्वबपैकी 28 रुग्णांचा अहवाल प्राप्त झाला आहे . त्यामध्ये एक रुग्ण हा पॉझिटिव्ह आढळून आला असल्याने नांदेड जिल्ह्यातील पॉझिटिव्ह रुग्णांची एकुण संख्या 98 झाली आहे . आतापर्यंत एकुण 98 पॉझिटिव्ह रुग्णांपैकी 30 रुग्ण हे बरे झाल्यामुळे त्यांना रुग्णालयातून सुट्टी देण्यात आली आहे . तर 61 रुग्णांपैकी 10 रुग्ण हे डॉ . शंकरराव चव्हाण वैद्यकीय महाविद्यालय नांदेड येथे तर पंजाब भवन कोवीड केअर सेंटर व यात्री निवास कोवीड केअर सेंटर येथे 49 रुग्ण आणि बारड ग्रामीण रुग्णालय येथील धर्मशाळेत कोवीड केअर सेंटरमध्ये 2 रुग्णांवर औषधोपचार सुरु आहेत औषधोपचारास प्रतिसाद न दिल्यामुळे एकुण पॉझिटिव्ह 5 रुग्णांचा मृत्यू झाला आहे . मृत्यू पावलेले 5 रुग्ण हे रक्तदाब , मधुमेह या आजाराने बाधित होते . या आजाराने बाधित रुग्णांनी विशेष काळजी घ्यावी . अफवांवर विश्वास न ठेवता मनात कुठल्याही प्रकारची भिती बाळगू नये व अत्यावश्यक कामाशिवाय घराबाहेर पडू नये आणि नांदेड जिल्हा प्रशासनाला सहकार्य करावे . तसेच आपल्या मोबाईलमध्ये " आरोग्य सेतू अॅप " डाऊनलोड करुन घ्यावा , जेणेकरुन आपल्या सभोवती कोरोना बाधित रुग्ण असल्यास आपणास या अॅपद्वारे सतर्क राहण्यास मदत मिळेल , असेही आवाहन जिल्हा शल्यचिकित्सक डॉ . निळकंठ भोसीकर यांनी केले आहे .